日本藝能界中出名一個人食飯既有永遠結唔到婚既桑野（阿部寬），以及胃口深無止境既上班族井之頭五郎（松重豐）。

 

岩岩好今季佢地分別回歸繼續食食食，小編亦唔執輸，為大家介紹一間五郎去過食都讚好既餐廳！

超邪惡原條方包白汁焗菜

呢一間餐廳位於東京鶯谷（うぐいすだに / Uguisu Dani），當地出名多Love Hotel但其實正經景點、餐廳一樣唔少，就近上野既酒店的話鶯谷亦有不少好選擇。

 

店名「喫茶デン」（喫茶DEN）其實係玩食字梗，店=DEN=デン，繞左一圈其實即係喫茶店 / CAFÉ ……

 

今次小編去試食既正正係當日五郎品嘗過既超巨型料理：原條方包白汁焗菜

日本計算方包通常使用「斤」為單位，標準重量為600g，實際大小約為一個邊長12.5cm的正方體，重量一般介乎340~500g。而日本國內買到既包裝切片方包通常係1斤切成4、6或8片。

 

DEN既「原條方包白汁焗菜」就用左一整條達1斤既方包，挖空中心之後填入滿滿既白汁焗菜。咁重份量既料理價錢不過係950円！！

 

除左常時有供應既「蝦仁火腿」（即係五郎食過既款式），仲有周末及假期限定既「燉多蜜醬牛筋方包磚」，各有各特色。

小編當然要跟從五郎的腳步（其實係因為當日係平日無得試牛筋 …）試白汁焗菜。方包本身有烘過更似多士既質地，中心既白麵包唔知變成左咩野其他料理，不過「方包蓋」就隨碟送上。

 

價錢雖然唔貴但總不欺客，白汁唔會水汪汪，超足料每啖都食到有肉有菜！

食左一半之後試下將成個方包打直劏開，可以見到白汁直達方包底部，一路食面包會吸收醬汁變得愈黎愈滋味！

超重型軟雪糕咖啡

另一款必須介紹既係「コーヒーフロート」（Coffee Float），同一般既雪糕咖啡不同之處係個雪糕既SIZE！

 

呢度已經唔係講緊1球定2球雪糕，而係成個軟雪糕倒轉插落凍咖啡裡，想要呷一口咖啡的話你首先要做既努力clear左個軟雪糕先。當然如果你唔係一支公去玩而係有朋友（or男/女朋友同行）的話，可以將你唔想食既部份塞俾佢 ……

將上邊既一半讓俾人，剩低既雪糕可以慢慢食，溶化既雪糕會將齋啡變成一杯香濃醇厚既咖啡 ……

店鋪資料

店名：喫茶デン（喫茶DEN） 地址：東京都台東区根岸3-3-18 メゾン根岸（鶯谷） １Ｆ 營業時間：09:00~18:30 (L.O. 18:00) 休息日：不定休

---

下載粹日本App，網羅更多日本資訊 iOS Android

 

發現文章有任何問題請話俾小編知☞ 回報表格