上圖既髮型你有無見過？如果你有睇過時代劇（即古裝劇）如大河劇、《大奧》，或者漫畫如《銀魂》的話你一定有見過呢一種稱為丁髷（ちょんまげ）既髮型。 審美觀當然係隨著時代、文化而有所改變，但係呢一種將頭頂頭髮剃光光後多此一舉將後尾枕既頭髮再摺番上去既做法 ......至少睇落就唔多合理。 今次粹日本就帶你回到過去，考究一下武士點解要剪一個咁有特色既髮型！

丁髷其實亦係fashion既一種？

自平安時代起貴族以及武士會將頭頂既頭髮剃走，呢一種髮型被稱為月代（さかやき），而將剩下既頭髮紮成一束後翻轉放上頭頂就成為現時我地理解既「丁髷」。 月代髮型響戰國時代非常流行，過去既社會講究士農工商既階級，正確黎講月代只有武士同貴族先會使用，但其他階級既人一樣會跟風「梳番個武士頭」，所以就出現一街都係丁髷既景色。
既然係先有月代後有丁髷，咁月代髮型又係點解會出現既呢？

武士上陣出戰時需要戴上名為兜既頭盔，而兜最覆蓋得密密實實既就係頭殼頂既部份。為左確保散熱唔會打打下仗自己就中暑暈低，就將頭頂頭髮剃去以便利流汗同汗水蒸發。

武士頭在現代

時至今日咁有特色既髮型平日當然見唔到，但相撲界依然沿用由丁髷演變出黎既「大銀杏」髮型。不過同武士頭唔同既係相撲手並不會剃月代頭，而係將留長既頭髮梳成銀杏樹葉一般既形狀。

---

下載粹日本App，網羅更多日本資訊 iOS Android

 

發現文章有任何問題請話俾小編知☞ 回報表格