近年動物CAFE有如雨後春筍般湧現，除左貓貓狗狗以外同平時無機會接觸到既罕見動物見面機會愈黎愈多。而呢一間位於淺草既「Mofureru屋 喀拉哈里」就能夠滿足你親近罕有動物既願望！

 

水獺、耳廓狐、狐獴、八齒鼠以及唔同既爬蟲類！平時只聽其名無機會見真身既動物就響淺草等緊你！

水獺

呢2隻小水獺分別叫做「炸茄子」（アゲナス）同埋「舞茸」（マイタケ），可以體驗喂食，只要將小食放響手心水獺就會拎黎食，非常可愛！

 

 

記得留意，切勿觸摸用餐中既水獺們，靜靜地望住佢地影相啦！用餐過後就可以放心同佢地玩啦~

 

 

水獺有將物品收埋既習性，小編用店方提供既公仔同鈴鐺同呢2隻野玩既時候，玩下玩下就唔見曬D玩具，原來不知不覺間就俾佢地收曬落梳化既cushion下面XD

 

 

唔覺唔知水獺既細手仔非常靈活~ 同水獺玩時只可以輕撫，唔好抱起、拉扯、提起水獺！

 

狐獴

《獅子王》裡面都有登場既狐獴，不過即使係新版電影中既狐獴都唔會比得上真‧狐獴！

 

 

有著長長既前爪以及鍾意掘窿既習性，對人類衣物上面既袋同鈕，以及飾物都有濃厚興趣。因此同佢地玩之前記得先除低身上飾物，亦唔好響衫袋裡面放野。

 

 

佢地相當痴人，只要坐響地下就會訓上你身上，爬黎爬去搵一個佢覺得舒服既位置！

 

 

一次過跑過黎三隻狐獴簡直可愛得不得了！

 

 

據說用後腳直立既姿勢有不同目的，例如用太陽暖和身體，以後威嚇天敵等。店外面有車經過時佢地會一齊企起身☝

 

 

可以同狐獴親身接觸既動物CAFE相信唔多！狐獴係可以抱抱既，參考店內poster就得！

 

耳廓狐

耳廓狐係世上最細既狐狸，店內既耳廓狐有一個你同我都耳熟能詳既名字「大雄」（ノビタ）。

 

 

耳廓狐雖然好鍾意摸摸，但肚仔係敏感部位，摸頭摸手仔最好！

 

 

小編去採訪既時間剛好遇上大雄眼訓，希望你去玩既時候佢訓醒啦！

 

八齒鼠

細細隻、圓轆轆，勁可愛！

 

 

望住佢落力食樹葉個樣超治癒！

 

爬蟲類

除左以上既小動物外店內亦有爬蟲類，鬃獅蜥睇落好惡其實摸落幾舒服，而且爬蟲類係冷血動物所以夏天涼浸浸！

 

 

日本某知名女演員都有飼養既豹紋壁虎。

 

 

淺草係有名遊客區大家都會去，影完雷門之後順便去同動物們玩下放鬆下啦！

注意事項

・如因店內動物行為導致私人物品破損及/或身體受傷，店方概不負責。 ・醉酒人士不可入內。 ・拍照時請勿使用閃光燈。 ・撫摸動物時請放輕力度。 ・不要觸摸動物口部。 ・易損物品及飾物請提前拆下並妥善收藏。 ・請勿站立時撫摸動物。 ・請勿追逐、驅趕動物。

Mofureru屋 喀拉哈里（もふれる屋カラハリ）

地址：3-1-1-2F, Asakusa, Taito-ku, Tokyo, 111-0032, Japan(Google Maps)

 

入店時間：11:00~14:00, 17:00~19:00整點（15:00~16:00為動物休息時間，每節一小時）

 

費用：[平日] 2,500円(連稅) [星期六、日及假期] 2,800円(連稅) 　　　　　*12歲或以上可以入內，未滿16歲需有監護人陪同

 

官方網頁：https://www.moff-kalahari.com/

 

預約：https://www.moff-kalahari.com/%E3%81%94%E4%BA%88%E7%B4%84%E6%A1%88%E5%86%85/

---

下載粹日本App，網羅更多日本資訊 iOS Android

 

發現文章有任何問題請話俾小編知☞ 回報表格