東京都食肆禁煙新例　以後遊日食少好多二手煙！

日本煙民人口眾多，過去不論係一般餐廳定居酒屋都係傾向於便利吸煙者，全店可吸煙不在少數，即使有劃分吸煙區、禁煙區彼此之間唔一定有明確分隔，「分煙」並不實用。

東京都為左減低室內二手煙（屋内での受動喫煙）對非吸煙者既影響，從9月1日起會先行實施「吸煙‧禁煙標誌義務化」，只要參考店面既標誌就知道係「全面吸‧禁煙」定係「部份吸‧禁煙」；

而明（2020）年4月1日起屬指定類別既處所將會實行「室內全面禁煙」（或於室內設置符合標準既專用吸煙室），東京向無煙城市邁進一大步！

（此法例同時規管醫療設施、學校、政府機關等處所，惟不在本文討論範圍）

~2020年3月31日：標誌義務化

過去日本餐廳並無義務標示出禁煙、吸煙範圍，大型連鎖食肆的話通常做得好足，但小型個體戶的話就只能靠問店員或者觀察其他食客既確認，對於言語不通既外國旅客而言確實不便。

從即日至2020年3月31日為「二手煙防止條例」（受動喫煙防止条例）過渡期，飲食店必須於店面標明店鋪屬於邊一種類別：全面禁煙、各類型分煙（時間、範圍、樓層）及全面可吸煙。

過渡期內飲食店依然可以自由選擇是否容許客人於店內吸煙，直至2020年4月1日起新法正式實施。

2020年4月1日起新法例會正式實施，飲食店將會分成以下幾類：

1) 全面禁煙

2) 設置符合條件的室內吸煙室

　　a) 吸煙專用室：可吸食一般香煙及電子煙，但不可在該室內飲食　　b) 指定香煙專用吸煙室：只可吸食指定電子煙，但可在該室內飲食

3) 室內可吸煙（只限沒有受薪員工的飲食店，店主可自由選擇吸‧禁煙，須於店外標明）

至於「屋內公眾吸煙所」、「以吸煙為主目的既酒吧（バー）、小酒吧（スナック）」（有販賣香煙而不售賣主食）等處所則屬於可以自選部份吸煙（符合條件的吸煙室）或全面可吸煙，同樣必須於店外標明。

下載粹日本App，網羅更多日本資訊 iOS Android

發現文章有任何問題請話俾小編知☞ 回報表格