一隻簡單既雞蛋，每個地方都有獨特既料理方法。好似香港人即使無食過都一定聽過既「澳牛鮮奶炒蛋」，仲有大家時不時必食既「〇蛋治」。當然仲有只用蛋白既賽螃蟹、瑤柱蛋白炒飯，通通都係少左呢一隻蛋就冇可能做到。
至於日本人既雞蛋料理當然唔少，親子丼、玉子燒、蛋包飯通通都係大家喜歡食既日本野。之但係日本人食蛋非常有方法，其中最特別既就係對生雞蛋既喜愛。
小編當然知道香港人打邊爐時會用生蛋當醬汁，窩蛋牛肉飯裡面既一樣係生雞蛋。只不過日本人對生雞蛋既愛，以及為左食到生蛋既努力係達超你想像！
生雞蛋營養更豐富
雞蛋含有豐富蛋白質、鉀，維生素A，維生素D，維生素B，DHA，ω3，葉黃素以及鐵質，本來就係非常有營養既食材。根據研究雞蛋煮熟後雖然令蛋白質易於被人體吸引，但亦使得維生命含量減低20~30%不等。綜合而言生雞蛋能夠提供既營養更多。
日本人愛食生蛋固然可以吸收更多營養，但係生雞蛋一個不慎就係病菌既溫床。日本國內既雞蛋不論價格高低都可以在指定期間內生食。相反小編屋企人一定唔俾食生蛋，原因就係信唔過買番黎既蛋可以生食。
日本既蛋有咩咁特別？
嚴格選蛋、洗蛋，讓你食得安心
食生雞蛋最大危險係沙門氏菌。雖然日本生雞蛋並非100%安全，但出意外既機率非常非常低。偌大一個日本，每個地方買到既雞蛋都咁安全，原因在於挑選、清洗、包裝雞蛋既過程做到最好。
收穫雞蛋後首先要經過清洗，然後使用精密機器進行挑選同包裝。
使用既機器有著多種功能，除左平衡雞蛋擺放位置使蛋黃唔會碰到蛋殼外，亦能夠有效清除蛋殼上既污物、細菌，以及檢查蛋上面有冇裂痕、血點。
如果雞蛋達唔到標準的話就會被篩走，唔可以作為「可生食」雞蛋出售，或者直接銷毀不被食用。
市面上發售既雞蛋除特別註明外均為可以生食既蛋，而雞蛋（每個/每份）都會寫明「賞味期限」，呢度既賞味期間指既就係「可以安全生食既限期」，一旦逾期就只能作為熟食。
日本的生雞蛋文化
日本人愛食生雞蛋已經去到方方面面，同樣一隻生雞蛋食法多多，以下既日式生蛋料理你又試過幾多？壽喜燒 (すき焼き)
響香港都可以食得到既壽喜燒，最經典既沾醬就係一隻pure既生雞蛋。香港打邊爐有N咁多款湯底，而壽喜燒則係用鹹甜兼備既醬料料理肉片同蔬菜。
半熟蛋 (煮卵) / 溫泉蛋 （温泉卵）
另一種大家最常食到既生蛋料理，相信就係隨拉麵附送（或加錢）既半熟蛋。唔同既拉麵有著各自既秘方，甚至響日本仲出現過拉麵店被偷蛋既新聞。
比半熟蛋更生既係溫泉蛋，不單蛋黃連蛋白都係半固體狀。溫泉蛋通常用黎做丼飯既配菜，拉麵上面就難D見得到啦。
烤牛肉片丼 (ローストビーフ丼)
好好地一片片既Roast Beef，去到日本人手上就變成左丼飯既材料 ......日本既烤牛肉片丼（及部份丼飯）都鍾意加一個生蛋黃落去，好唔好食就見仁見智啦。
釜玉烏冬 (釜玉うどん)
所謂既「釜玉烏冬」係響新鮮煮好既烏冬上面加上生雞蛋以及豉油base既醬汁。烏冬既餘熱其實會將雞蛋稍為加熱，變成好似carbonara一般既creamy口感。
生蛋撈飯 (卵かけご飯, TKG)
最後黎到打大佬既時間，呢一道日本人必食必知既「料理」材料非常簡單：飯、蛋、豉油，做法亦非常簡單：
1) 將生雞蛋從蛋殼中取出並放在白飯上面 2) 加入豉油 3) 撈
日本人對生蛋撈飯既愛有幾強？除左有屬於自己既簡稱「TKG」之外，仲有廠商推出左一部「究極のTKG」機，俾你用更複雜既方法黎完成呢一道堪稱史上最簡單既料理。（PS：如果有櫻花仔/櫻花妹同你講佢議煮野，必須問清楚佢是咪只識TKG同公仔麵 ...）
下載粹日本App，網羅更多日本資訊 iOS Android
發現文章有任何問題請話俾小編知☞ a00620
