香港有「觀音借庫」呢一種民間信仰，先不論借庫一借就俾億億聲，更有趣既雖然借既唔係實物、現金，但一年過去借庫有時，還庫亦有時，正所謂有借有還上等人。 我地去日本旅行時不時會求番一張御神籤（おみくじ），或者買番幾個保佑方方面面既御守（お守り），你又知唔知道神籤也好，御守也好其實都要特別處理，並唔係可以隨便棄置，亦唔係可以一個御守袋一世。

神社、寺廟要分清楚！

日本主流宗教場所分為兩類：神社及佛寺。神社為日本既神道場所，而佛寺就當然係佛教。兩種地方都有得求籤、買御守，但要留意神社既歸神社、佛寺既歸佛寺。 本文提到既一切處理方法都要遵從呢個原則。特別係交回傍身既神籤、御守時即使選擇既係就近既宗教場所，都要記得唔好將神社既御守交去佛寺。

個名有「社」、「神社」、「大社」、「神宮」既係神社，「寺」、「寺院」、「院」則係佛寺，應該唔需要教都明白（笑）。

御神籤：好運帶走、惡運留低！

響神社、寺廟求得既御神籤會分成三六九等，由大吉一路去到大凶。一般主流講法係吉籤就原張帶走，至於凶籤就將籤文綁於神社寺廟境內。過去多將籤文綁於樹上，不過近年保育意識加強，唔少社寺都會響專用區域設置繩牆，只要將籤文綁響繩上即可。據說咁樣做可以起到轉凶為吉既作用。

亦有講法指不論吉凶都可以帶走，理由係神籤上寫有神佛既指導、告誡。即使唔係吉籤都有著自省既作用，妥善保存定期回顧、反思並無不可。同樣亦有說法指不論吉凶都可以於求得籤文後綁好唔帶走，所以話要帶走定要放低，其實真係無固定規則。

 

帶走既神籤是否可以保你一世平安？主流說法有兩種： ①效力以1年為限 ②效力至下次求籤為止

 

邊種可信就自行決定啦。

至於帶走既神籤要點樣棄置？大前提係要存有敬畏之心，唔好亂丟。可以選擇拎去就近神社（無話一定要去番同一間神社），綁於繩上，或者放入專設既收集箱即可。 自行處理既話需要使用天然鹽，食鹽響日本文化中有清潔既作用，將神籤放入膠袋或和紙紙封內，加上鹽後按一般垃圾棄置方法處理即可。

 

其他推薦文章 ☞秋田縣竿燈祭期間兩日一夜遊 ☞神社參拜要訣教學 ☞侍茶師讓你品味日本茶的美

 

御守：幾靚幾可愛都有期限！

御守本來就係求黎消災解禍保平安，既然有明確（期待）效果既話自然就有明確既到期日。一般睇法係御守有效期為一年。一年過雖然唔會話即刻expire，但效果會因為沾染邪氣而漸漸消退。

如果御守既目的係「考試合格」、「安產」等等，保佑有既定結束日既活動的話，考試結束、BB順利出世後就自然到期。

御守最好既處理方法係交由神社/寺廟，而且最好係交番去購買御守既地方。多數神社寺廟都會設有專用既御守回收箱，響感謝神佛一年間既保佑後將舊御守放入即可。同時響交回御守時將同等金額既捐錢放入賽錢箱亦係一般做法。

如果難以返去本來既神社、佛寺的話，亦可以將御守交回就近既社寺，即使唔係自家出品都一樣會收好，然後同神籤一樣拎去梵化。真係無辦法的話亦可以用和紙包裹後加入天然鹽，淨化後棄置。

 

---

下載粹日本App，網羅更多日本資訊 iOS Android

 

發現文章有任何問題請話俾小編知☞ 回報表格