粹日本過去出過文章介紹最受日本人歡迎既5個燒肉部位，今次就介紹5大稀有部位，不如睇下你又試過幾多款？ （讀音為配合香港人既特別拼寫，並非正式日語羅馬字拼音）
第五位：トモサンカク（腿三角 / Tomo Sankaku）
顧名思義，腿三角係牛腿肉之中一個三角形既部位，腿肉中腿三角既肉/油脂比例均衡，可以展現出高品質既霜降紋。同時腿肉本來又以肉味濃郁見稱，因此腿三角可以同時食到香濃牛肉味道以及入口溶化既油脂香味。稀有程度：250kg牛隻中可取約5kg 參考價格：1,800~2,300円一碟
第四位：三角バラ（三角肋骨肉 / Sankaku Bara）
三角肋骨肉係牛隻肩肋骨肉中既一部位，切好後為三角形而得名。霜降分明被稱為「最高級的肋骨肉」，響燒肉店見到既「特上カルビ」（特上肋骨肉）通常就係呢一個部位。 （カルビ同バラ同樣係肋骨肉，而カルビ係源自韓文。）稀有程度：250kg牛隻中可取約1kg 參考價格：1,800~2,300円一碟
第三位：ザブトン（座布團 / Zabuton）
又稱「羽下」部位，係肩里肌至肋骨肉至間既一個部位，同第4名一樣，響燒肉店點「特上カルビ」的話就有機會食得到。有「座布團」呢個名係因為呢個部位既形狀睇落似一塊日式座墊。 「座布團」同樣係霜降分明既部位，而且有著獨特既香味、口感，美味得黎同其他部位又有唔同。稀有程度：250kg牛隻中可取約1kg 參考價格：2,000~2,500円一碟
第二位：ミスジ（三筋 / Mi Su Ji）
三筋肉位於肩甲骨內側，因為連住三條筋腱而得名。三筋肉屬於前腕肉既一部份，前腕肉因為經常活動通常口感較韌脂量少，三筋肉因為位於肩甲骨處所以活動量較少，係前腕處少有脂肪含量高既部位。 肩肉中霜降最好、最柔軟既部位，牛味濃郁而餘韻分明，又被稱為「幻之肉」。稀有程度：250kg牛隻中可取約1kg 參考價格：2,300~2,800円一碟
第一位：シャトーブリアン（牛柳芯 / Syatoo Bulian）
呢個部位係牛柳之中肉質最佳既位置，最為柔軟甚至用筷子就切得開。並不如霜降同油脂著稱，美味之處係濃厚既紅肉旨味同香味。稀有程度：250kg牛隻中可取約600g 參考價格：4,000~7,000円一碟
燒肉就要食得招積！
想知道最受日本人歡迎既5大燒肉部位：https://press.ikidane-nippon.com/hk/eat-hk/4613 想了解和牛分級、和牛料理：https://press.ikidane-nippon.com/hk/eat-hk/9121 北海道燒肉名店：https://press.ikidane-nippon.com/hk/eat-hk/25045
