2018-11-27
Mister Donut x 寵物小精靈：超得意比卡超冬甩你捨得食嗎？
Mister Donut x 寵物小精靈期間限定商品
為左宣傳響任天堂Switch平台新推出既《Pokemon Let's Go》遊戲，11月16日日本Mister Donut就同寵物小精靈合作推出限定版冬甩，比卡超及精靈球款式均為每個216円（連稅），全線Mister Donut有售。
除左單買冬甩之外，Mister Donut亦有推出2個限定套餐，裡面包括限量既小精靈精品，今次錯過左實後悔一生！2個套餐詳情如下：
在店內見面吧！套裝（連稅800円）
小精靈冬甩1個+飲品1杯+限量小精靈杯墊1個+限量小精靈馬克杯1個
外賣回家見面吧！套餐（連稅1080円）
小精靈冬甩2個+小精靈冬甩1個或聖誕節冬甩2個+限量小精靈馬克杯1個+限量小精靈外賣紙盒1個。
是咪聽到都心動？粹日本小編們就火速入手外賣套裝，俾大家睇下有幾吸引！
外賣套裝內容
外賣套裝有限量小精靈紙盒以及馬克杯各一個，真心想將個紙盒清潔乾淨留念！
冬甩最多可以選4個，2個小精靈冬甩加1個（小精靈）或2個（聖誕節）冬甩；比卡超及精靈球當然每樣一個必定入手，另外選擇2個聖誕節限量款式！
比卡超冬甩
你估下呢個咁得意既比卡超冬甩係咩味？
登登登登！黃色部份其實係香蕉味朱古力coating！
中間有雲尼拿忌廉，調味唔會過重過甜，雖然覺得比卡超有D可憐，三兩啖就食清光！
精靈球冬甩
精靈球冬甩仲有一個特別版紙兜，上面既比卡超同樣可愛！而且 ......
反面係伊貝！正反兩面同樣得意~
精靈球冬甩係士多啤梨+白朱古力；小編本來諗住比卡超冬甩造型更可愛先係必買之選，但精靈球冬甩更有趣！
除左有比卡超+伊貝紙兜外，呢一個精靈球冬甩仲可以拆開兩半！只要買齊2款限量版冬甩就可以自己重現收服比卡超！
小精靈馬克杯
限量版馬克杯同樣係聖誕節設計，紅色主調配上雪花、禮物盒，以及比卡超同伊貝；
另一邊就印有第一代御三家，當然唔少得各種Mister Donut既冬甩登場啦！
期間限定冬甩到12月25日為止，冬甩以及各種精品都係數量有限售完即止，即將會到日本的話記得唔好錯過！
