落雨就要擔遮，呢一點無論邊個國家都係一樣。當你去到日本遇著落雨天，有無發現日本街頭佔大多數既都係—色一樣既透明長遮？更有趣既係同樣既透明遮你響香港想買都買唔到，小編有朋友甚至特登帶一把返香港用黎留念！ 日本限定既透明遮，究竟有咩咁特別？

透明膠遮的起源

透明膠遮係於約60年前由日本公司「ホワイトローズ株式会社」（White Rose），透明塑膠遮的誕生其實係無心探柳之舉；當時雨遮多使用染色棉布，但係顏色遇水就會融，擔住一把黑色遮就會落黑雨的話唔擔遮仲好 ……

 

為左唔整濕把遮，White Rose就用膠布幫把遮整左個膠套（即係幫雨遮整多一把遮），後來棉布被唔易甩色既合成纖維取代，正當透明膠套將被打入冷宮之際，終於有一個足夠聰明既人發現：直接將透明膠套痴響傘骨上面咪一天都光曬囉？

 

就係咁，透明膠遮誕生；可喜可賀可喜可賀。

透明膠遮紅得有道理

設計簡單無花巧既透明膠遮點解會成為日本最常見既遮款？現時日本國內發售既雨遮超過9成從中國輸入，2010年輸入量達1億162萬把，當中約6000~8000萬把係透明遮；

 

透明遮魅力之一在於價錢便宜。響便利店、超市、雜貨店用around 500円就可以入手，近年100円店加入戰團，用更加實惠既價錢(300円~)就可以入手。

 

另一方面根據日本氣象廳數字，近年「一小時內超過50mm兩量」既「大驟雨」愈黎愈多，失驚無神落起大雨手邊又無遮，300~500円就可以買到既透明遮就係廣大日本人既救星。

廉價雨遮其實唔止透明遮，點解相比其他七彩顏色透明遮可以突圍而出？業界人士以及研究消費習性既學者就提出以下理由：

 

1) 百搭唔會撞衫，適合女性眼光 2) 透明遮身可以睇到路面情況 3) 無強烈特徵，切合最多消費者需要。

 

方便的壞處

透明膠遮到處都買得到，購入成本低之餘又唔顯眼，當你重覆無帶遮->買透明遮->放響屋企三部曲，唔覺唔覺屋企就會放滿一堆透明遮。

亦有人會選擇用完即棄，停雨後路邊總會有一堆已爛、未爛既透明遮，亦有唔少人會忘記左自己把新遮，好似JR東日本一年就會收集到超過30萬把透明遮，關西國際機場（KIX）一年廢棄約2000把遮，估計係唔少人唔想帶遮上機唯有就地棄置。

---

下載粹日本App，網羅更多日本資訊 iOS Android