小編從來覺得香港人做得最出色既日本料理係回轉壽司，你諗下我地有明將，可以將紅豆同可樂糖融入壽司之中，轉下轉下咁，簡直係青出於藍啦 ...... 可能受到香港選手既啟發，7月時原宿表參道就開左一間回轉甜品MAISON ABLE Cafe Ron Ron，唔知會唔會有真‧紅豆蓉軍艦呢？

唔單止回轉帶上既甜品夠甜，連內部裝潢都一樣走可愛風格；唔好講咁多買飛先！

購票

Ron Ron既回轉甜品係放題制，先購票後進場，響LINE加Ron Ron做朋友既話仲可以有100円折扣（女性限定）！ 2019年2月1日起價錢如下： 女性：2,100円 男性：2,400円 6至12歲小童：1,700円 6歲以下小童：500円 放題附贈一杯飲品，主流既果汁、茶飲都有供應（6歲以下小童價錢不包飲品，須另購）。當然最重要既係：

打卡！

開餐！

店內只有一條回轉單，亦不設點餐服務，時間限制則為40分鐘。

一次最多取2碟，每次少少密密食的話回本唔難！記得唔好食剩呀！

店名Ron Ron是貓咪高興時發出聲響的擬聲詞。甜品設計上亦加入唔少貓元素。貓剪影（下圖前）以及從泡芙中突出的貓尾毛（下圖後）都一樣可愛！

粹日本精選TOP 3

小編冒住肥兩個碼既風險有幾多食幾多，為大家推薦真正好味值得添食既三款！ 【芝士慕斯】 芝士口味慕斯上面鋪滿小巧可愛既棉花糖。

【雪糕大福最中】 由上至下入別係脆口既心型最中（和菓子）、鮮忌廉、雪糕大福，小編建議影完相後將成個甜品反轉食就最開心！

【朱古力慕斯、抹茶布甸】 less is more，朱古力幕斯香濃軟滑，抹茶布甸抹茶味夠香濃又唔會過苦。

回轉鹹點？

甜品幾好食都好食得多就會膩，記得留意回轉帶上面不時出現，俾你換下口味既鹹點，食番個蛋沙律三文治（前）、薯仔沙律（後）即刻原地滿血復活！（小編都係想食希靈魚多D ...） （同場加映：日本三大便利店蛋沙律三文治試食比較）

美食以外的小心思

甜品碟上、餐紙上，以及店內不同地方都寫著簡短既格言，「a piece of cake」原意係易如反掌，響Ron Ron當然同時代表你食緊既「the piece of cake」啦！

其他裝飾上既小心思就要靠你自己發掘啦！

為免俾大家知道小編既可怕食量，只放5隻碟入鏡~

想體驗日本最新回轉甜品？去原宿MAISON ABLE Cafe Ron Ron啦！

MAISON ABLE Cafe Ron Ron

地址：東京都渋谷区神宮前6-7-15(MAP) 營業時間 : 11:00 - 20:00（L.O. 19:00）無定休日 HP : https://cafe-ronron.com/ *10點開始發整理券，請按照上面寫的時間回店面等待入席。

---

下載粹日本App，網羅更多日本資訊 iOS Android