鍾意睇日本動漫作品既話一定有印象，裡面既角色每當趕時間返工返學時就會臨急臨忙拎起書包咬塊麵包就跑出門口。但係除左動漫作品以外，你又唔會響日劇、日本電影見到一樣既情況，即使去日本旅行時都唔會見到有學生、上班族真係一路咬包一路飛奔。究竟戲內戲外邊一個先係真正既日本？

邊行邊食係唔禮貌

響香港掃街時邊行邊食係好平常既事，相反響日本係唔鼓勵邊行邊食野，會視之為無禮貌、無儀態既行為。日語中雖然有一個詞語「食べ歩き」，只睇字意好似同掃街一樣，但係響日語語境中係指「食完一間去下一間」既意思，並無邊行邊食既意思。你黎日本旅行時可能亦會發現，唔少食店會設有座位 / 站立空間係你享用小食，或者會有告示提醒唔好邊行邊食。因此大部份時候你都唔會響現實既日本見到有人街上咬方包，即使係雪糕、小食既類都罕見。

日本人正餐後刷牙

小編屋企教落起身後訓教前各刷牙一次，亦唔見香港人普遍有餐後刷牙既習慣（相反食香口膠就普遍得多）。日本人大多數都會隨身帶備牙膏牙刷，吃完三餐後即使係響辦公室、學校都會刷牙以保口腔清潔。因為趕返學而咬包出門口的話，就代表要邊返學邊刷牙，同樣唔實際。

邊行邊食好危險

邊運動邊食野無益健康之餘仲好危險，相信無須多作解釋啦 ......

咬包飛奔返工返學，係真唔係？

其實最簡單當然係響日本觀察真正既日本人，香港人買串魚蛋食住行既身影響日本接近不可見，你就知道咬包跑返學並不是事實。反之日本人會響電車車廂裡面開餐，呢個又係另一個值得解說既故事啦~

---

下載粹日本App，網羅更多日本資訊 iOS Android