一次過搞懂日本的士收費、服務、特色！

日本的士出名服務好、坐得舒服，亦出名收費貴，「一分錢一分貨」，你黎過日本咁多次，又有無享受過高質日本的士？今次就由粹日本小編為你理清日本的士同香港有咩分別！

日本的士點揀好？

日本的士業界由「個人的士」以及「法人的士」組成，分別係獨立營運既的士以及公司規模營業既的士。香港的士以顏色區分營運範圍以及收費，日本的士同樣有不同顏色，但顏色、車型的分別多數係由個人/法人，以及唔同的士公司導致；日本的士收費由各地縣政府劃一規定（附加服務除外），所以無須特別等待某種顏色既的士，見一架上一架就得。（有關特別收費請參考下文）

日本的士收費模式

首先要留意既係，日本的士既收費同樣按照不同地區有差別，東京的士同大阪的士響收費上就有分別。以下為大家整理各個常去地區既的士收費資料：參考來源：https://www.taxisite.com/far/ （時間距離混合式收費為高速道路以外，時速10km以下行駛時的收費方式。該路途會既按距離收費，同時按所費時間收費；使用高速道路時不論速度只按距離收費）

東京（東京23區、武蔵野市、三鷹市）

首段收費：410円（首1052米）按距離收費：80円（每237米）時間距離混合式收費：80円（每90秒）接送費用：各公司不同

大阪（大阪市）

首段收費：680円（首2000米）按距離收費：80円（每266米）時間距離混合式收費：80円（每100秒）接送費用：各公司不同

京都（京都市）

首段收費：450円（首1200米）按距離收費：80円（每255米）時間距離混合式收費：80円（每95秒）接送費用：各公司不同

名古屋（名古屋市）

首段收費：450円（首1050米）按距離收費：80円（每235米）時間距離混合式收費：80円（每85秒）接送費用：200円

北海道（札幌市）

首段收費：670円（首1600米）按距離收費：80円（每302米）時間距離混合式收費：80円（每110秒）接送費用：一般免費（部分收費）

沖繩（那霸市）

首段收費：550円（首1750米）按距離收費：70円（每372米）時間距離混合式收費：70円（每135秒）接送費用：一般免費（部分收費）

其他收費

除左上述費用外，大家記得留意日本的士普遍會收取「深夜附加費」，以日本某大型的士公司為例，22:00至翌日5:00時會加收2成費用，計算方法是將上述既距離除以1.2，即係跳錶幅度相同但頻率提高。深夜期間的士咪錶牌會由平時顯示既「空車」換成「割增」，坐上「割增」的士的話就要額外俾呢筆深夜附加費；而現時有部份的士實行「不收深夜附加費」，車門窗上貼有「割増なし」既的士就係不收附加費。

另一方面行李以及動物（寵物）並無另外收費，不過亦要留意，小編響日本咁耐從未見過行李多到車尾箱放唔落既的士駛過，大家要量力而為呀。

自動開關的士門的起源

日本的士其中一個備受外國旅客注目的原因係的士門會自動開關，不單止唔需要乘客自己開門閂門，仲有一種講法係手多多去搞道門的話會招人白眼 …… 你又知唔知道點解日本的士既車門都有自動開關功能？最初設計出呢個機能既係大阪枚方市「ドンボ交通」。當你以為自動門既原意係為左客人著想，實情係日本的士於二戰後50年代普及化，當時不少乘客落車後忘記閂門，司機會從駕駛席伸手去閂門。但係後來的士用車換成較大型的「中型車」，從司機位伸手閂門的話既不方便亦易生意外；為左司機著想，「ドンボ交通」就開發出機動式開關裝置，後來大阪萬博將呢一種設計帶到日本全國，從此成為日本的士既標準配置。

可以俾卡，永無四捨五入

日本的士支援各種付款方法，對外國旅客最友善既莫過於係可以使用SUICA以及信用卡。SUICA的話一du就得，信用卡付費的話支援各大國際信用卡，搭的士俾錢未試過咁方便！即使俾現金亦一樣方便，而且童叟無欺唔會自動四捨五入找少一個幾毫，1円都會找足俾你，均真！

交通手段任你揀！

去日本旅行選擇去東京、大阪等大城市的話，JR、地鐵、巴士等等始終最方便，如果有特別需要的話的士亦係另一好選擇。同樣受港人鍾愛既北海道、沖繩等地區，公眾交通相比不完善，想去方便快捷又玩得自在的話，租車就係你既好選擇。想租車平過人？12月28日為止經以下連結使用Times租車服務可享25%折扣！ IKIDANE NIPPON x Times租車優惠

下載粹日本App，網羅更多日本資訊 iOS Android

發現文章有任何問題請話俾小編知☞ 回報表格