近年最受香港人注目既非娛圈日本新聞，除左2020東京奧運外就要數東京築地（場內）市場遷往豐洲。 唔少遊客可能會疑惑，築地市場搬遷講完又講，由最初聽聞會搬去豐洲到呢幾年都去左幾次東京，築地市場卻始終如一郁都無郁過，究竟係搬，定唔搬？ 今次粹日本就為你整理最新消息，帶你立即了解築地搬遷最新情報！

場內市場肯定bye bye

第一個已經徹底落實、確認既係新豐洲市場將於2018年10月11日正式營運，咁大個批發市場當然無可能一夜之間就搬過去，為左搬遷一事原築地場內市場（東京都中央卸売市場）將會於2018年10月9日及10日休業。

咁大個市場當然唔會響呢2日內話搬就搬到，最新消息係吞拿魚拍賣參觀（見學）將於9月15日結束，水產及蔬果批發既參觀則於9月29日結束。大家愛食既場內壽司等等只會營業到10月5日，場內部份由10月6日起封閉準備搬遷。

「築地美食」以後一個地方食唔曬！

香港旅客去築地，除左朝聖外另一個重要目的當然係「食」！個壽司的話有永遠唔知點gan既「壽司大」同「大和壽司」，必食玉子燒有4間咁多，仲有各式魚生、親子丼、海鮮丼，唔食番夠點得。

在 Instagram 查看這則貼文

Stenver Ko（@stenverko）分享的貼文 於 PDT 2018 年 7月 月 20 日 上午 8:09 張貼

可惜既係今次搬到豐洲既只有築地既「場內」市場以及本來位於場內既食肆，例如兩大壽司店、親子丼名店「鳥藤」等等都會跟著場內市場一齊去新家；

另一方面築地「場外」市場並不會跟隨場內搬去豐洲，因此大家愛食既玉子燒，以及其他位於場外範圍既食肆、賣店都會留番響築地。 以後想要入場內排壽司，臨走時再食多串玉子燒？再無呢支歌仔唱了。

築地以後將會大變樣！

場內市場要搬遷，歸根究底係因為築地場內已有75年歷史，設施本身早就老化，而舊式設備亦追唔上時代步履。搬遷過後亦唔可以將舊市場建築放響度就算。雖然未有詳細計劃，但可以預期往後築地原場內市場位置將會有大型的重建計劃。其中一個說法係將會作為新交通樞紐重建，以應對今後（2020年奧運）等既交通需要，之但係距離奧運只剩不足2年，進度又落後於體育場等建築，真係趕得切嗎？

比重建要快一步既係於2016年年尾新開設既「築地魚河岸」，有近60家由原築地場內批發業者經營既零售店進駐，場外市場一方既打算係即使少左場內市場既人氣，都仍然可以保持人流，成功轉型成另一模式既景點。

搬遷後去邊一個市場好？

10月11日後就無得好似以前咁一個地方食盡所有野，又有得入場內見學食壽司，又可以去場外買手信食小食。 豐洲最大魅力當然係其批發中心既地位同特色，搬遷完成重新開放見學的話又係一個好景點。而想要食番過去場內市場既食肆的話，最好方法就係跟著去豐洲，排隊。

豐洲市場本來仲會有一個名為「千客萬來」既新商業設施，不過營運單位同東京都達成唔到共識，至少響2020東京奧運前都無機會見到佢落成。

築地又有咩優勢？如果你目標係想食下玉子燒、買下手信的話，以零售為主既場外市場就比較適合你，而且場內市場要見學也好、食到長龍壽司都好唔朝早去排隊是唔得既，懶人都係去番築地啦。築地既本願寺本身亦係必去景點，想一次過滿足2個願望？築地就係較方便選擇。 好在築地同豐洲既距離唔不算遠，搭鐵路來往亦非常方便。將來既豐洲市場其實就響現築地以及台場之間，真心想去曬新舊市場的話並非不可能。只要乘鐵路到「市場前站」即可到達新既豐洲市場。

築地場外市場改新名？

築地外市場現時正舉行「築地名稱選舉」，希望藉改名唔好再被人誤會成個築地搬左去豐洲。 候選名稱有三個，分別係： ① 築地場外市場（唔改好過改） ② 築地魚河岸・外河岸（點都要留番個「外」字） ③ 築地食のまち商店街（日本人的商店街情意結） 唔鍾意上面三個名既話亦可以自由提案，而呢個新名稱選舉最觸目既係，投票選中最終新名稱既人可以參與抽獎，抽獎既特獎係 ……

「一條本吞拿魚（30kg）」（童叟無欺，活動網頁上面寫著架）

要點整理

・築地場內市場搬遷日程如下： 吞拿魚拍賣參觀結束日：9月15日 水產及蔬果批發既參觀結束日：9月29日 場內餐廳最終營業日：10月5日 場內市場關閉日：10月6日 搬遷工程日：10月9至10日 豐洲新市場首營業日：10月11日 ・場外市場不會搬遷，場外將會改名並加入新建築繼續營業 ・原場內市場將會拆卸後另作他用，確實用途未定

下載粹日本App，網羅更多日本資訊

iOS Android