作為東京都心交通命脈既JR山手線只要去過東京既人就一定識，當中最廣為人知當然有「東京」、「新宿」、「澀谷」、「池袋」等大家留低過唔少腳毛既車站。
如果要你倒數山手線的話，你又知唔知XX個車站裡面最少人用既車站係邊個？俾三秒你好好回憶下！ （謎之音：玩野咩港鐵最少人用既站都唔知啦 ……）
3 2 1！
正確答案：鶯谷站！（鶯谷駅 / うぐいすだにえき）
唔駛驚，小編知道你地同我一樣，之前根本連聽都無聽過呢個地方，但唔打緊，有小編響日本近幾年最熱既日子親身去採訪，話你知鶯谷有咩好去！
出發！
鶯谷站周邊遊經實測大約要半日左右，想朝早起身玩半日之後其第二度又得，上晝先去左附近既地點先，然後下晝花半日去行下食下又可以~
既然係山手線最少人用既站，有咩好便得過搭山手線前往？鶯谷站位於上野站同日暮里站之間，池袋、東京站出發好快就到。
話口未完我地已經黎到鶯谷，小型車站無咁多人，另有一番風味。
第一站：上野郵局GET風景印
咩係風景印？日本有一部份會有「該局限定」既郵戳，設計精美之外仲係限定版，又靚又有紀念價值。
鶯谷站行約3分鐘就可以到達上野郵局，想要風景印既話既可以寄明信片時要求，亦可以響支付郵資之下要求蓋印於非郵件之上。小編今次就買左熊貓明信片，日本國內的話可以直接入郵筒，國際郵件就要向職員查詢。
寫好明信片入郵筒就得，風景印設計得意又有地區特色！想知道多D日本郵局風景印既二三事？下面有詳細介紹！
讓你的明信片更特別！郵局限定「風景印」特集（東京篇）
第二站：肚子餓了吃飯去
無論你係上晝定下晝去鶯谷，坐完車去完郵局應該都開始肚仔餓，鶯谷名物之一係《孤獨的美食家》井之頭五郎都去過既「喫茶DEN」，從郵局出發行約5分鐘就到。
要留意該店會不定期休息，食唔食得到就要睇運氣啦。
一間喫茶店有2種名物，先上「グラパン」！菜名係「グラタン」（白汁焗菜）＋「食パン」（方包），原個方包挖空，放入滿滿既白汁餡焗到香脆熱辣，唔係親眼見到都唔知有幾震撼。
食到二個小編飽到上心口既グラパン都不過係850円，唔好以為大份就將貨就價，小編點既「蝦仁火腿」非常足料，蝦仁非蝦米，食到最尾都仲有！
用方包點白汁食，記得小心熱！方包殼既可以保溫又吸收白汁精華，愈食愈滋味。
周末、假日限定「燉多蜜醬牛筋方包磚」，同樣係850円，一黑一白好難揀呀><
食完正餐就要飲杯野食甜品，一次過滿足你兩個願望既「コーヒーフロート」，凍啡上面放一大個軟雪糕，又係質量兼備！
古有香港茶餐廳黑牛、白牛，今有喫茶DEN既獨角斑馬，異曲同工一樣精彩！
店鋪資料 店名：喫茶デン（喫茶DEN） 地址：東京都台東区根岸3-3-18 メゾン根岸（鶯谷） １Ｆ 營業時間：09:00~18:30 (L.O. 18:00) 休息日：不定休
另一選擇：熱辣辣食鰻魚
東京有唔少鰻魚名店，而位於鶯谷既「入谷鬼子母神門前のだや」就入選日本Tabelog百名店之一，如果唔想食方包既話，呢度係你好選擇。
（出處：Légume@Tabelog）
點解日本人熱天要食鰻魚？由粹日本為你解秘！
入谷鬼子母神門前のだや 地址：東京都台東区下谷2-3-1 營業時間：11:00~售罄，17:00~售罄 休息日：星期一（星期一為假期時星期二代休）
第三站：日本文化體驗遊
名神社名寺廟日本有唔少，清水寺、明治神宮、嚴島神社等等大家耳熟能詳。另一方面日本到處都係小型神社同寺廟，當中多數都係服務地區，而且不單提供宗教場所的功能，唔少仲係當地居民代代承繼的族墓所在地。
響喫茶DEN食完野，順著大路繼續行就會經過好幾家小神社、寺廟，好似上圖既「千手院」，以及下圖既「永稱寺」。
再向前行少少有「円光寺」，即使幾外國旅客圈子中並非有名，亦無咩寶物殿、展覽可以睇，但想要感受一下日本人日常既宗教活動，又或者想睇下日本神社、寺廟既建築既話，呢一類小現神社、寺廟係你既好去處。
除了社寺外，鶯谷內仲有一個小眾好去處，經過上述社寺後轉左行約5分，就可以到達「台東區立書道博物館」，年間展出不同主題既書法作品，對博物館、美術作品有興趣的話就唔好錯過！
館內不可拍攝，但唔講唔知博物館職員非常有玩心又明白現代人「影低重要過做過」既心理，館內不時會貼有搞笑告示，明明叫你唔好影相，大家反而爭住影餐飽！ （下圖譯文：收埋相機比較好哦？ / 影埋呢張好啦？ / 無問題！）
第四站：又肚餓了吃甜品去
睇過社寺睇過博物館，開始又肚餓想食野了。方才食左洋食白汁焗方包，甜品一於食日本既傳統甜品！
「麻糬、日本茶專門店月光」顧名思義專賣日本傳統既麻糬，配上日本茶係純和風體驗！店名月光，吉祥物當然係吳剛玉兔啦！
一塊麻糬可以有無窮變化，甜點，得！鹹點，亦得！小編二人組就按自己喜好點餐， 麻糬大好小編揀左一日限定三份「三段重」（平日限定1280円），三層分別係「極上黃豆粉麻糬」、「紅豆蓉麻糬」以及自選既第三個麻糬。
麻糬小編：食得出每日鮮製既麻糬口感同味道都有分別，而且三款唔同味道簡直係一次滿足三個願望！
至於對麻糬一般既另一小編就點左「月光善哉」（950円）。善哉（ぜんざい/Zenzai）本身類似加左麻糬既紅豆糖水；
而月光既善哉主體係冷抹茶，加上自家製麻糬、抹茶雪糕以及紅豆蓉，稍為新派既和式甜品，行左咁耐可以飲啖茶食下雪糕既小編表示非常高興。
お餅と日本茶の専門店 月光 地址：東京都台東区根岸3-7-18 エルアルカサル鶯谷 1F 營業時間：【平日】12:00~19:30(L.O.19:00) 【六日假期】12:00~19:00(L.O.18:30) 休息日：星期三
另一選擇：Tabelog百名店洋菓子
唔鍾意麻糬無問題，鶯谷區內同樣有臥虎藏龍既洋菓子店！パティシエ イナムラ ショウゾウ（PATISSIER INAMURA SHOZO）同上文提到既鰻魚飯一樣名列Tabelog百名店2018，由日本定番士多啤梨蛋糕到各種用上日本食材製作既蛋糕、甜品，唔怕你無心水！
（出處：ぽちのかいぬし＠Tabelog）
（出處：焼肉姉妹＠Tabelog）
パティシエ イナムラ ショウゾウ（PATISSIER INAMURA SHOZO） 地址：東京都台東区上野桜木2-19-8 營業時間：11:00~18:00 休息日：星期一、每月第三星期二
終點站：大掃平野@業務超市
行完一輪又睇又食準備走人？最後一個不可不去既地方係比平更平既「業務超市」！
（給沒有聽過業務大名既你：業務超市係日本一個連鎖超市品牌，業務既意思係批發，不過除左接受批發外亦有做零售業務，而且商品平過一般超市、便利店一大截，即使係同激安殿堂都有得fight！）
夜晚橫dim都係返酒店睇電視，點可以唔準備番D小食野飲，睇住電視傾下計？響業務超市買到各種飲品，由茶；
到酒類類一應俱全，冷藏、常溫任你揀。
佐酒小食同樣選擇多多，大家都食過既「美味棒」響呢度有大把味道選擇，買黎做手信、自用都得！
至於想入手日常食品既你，業務既商品大件夾抵食，而且包裝、味道都唔失禮！
業務スーパー 上野公園店 地址：東京都台東区根岸１丁目２ 台東区根岸１丁目２番１３号カンデオホテルズ上野公園１F 營業時間：9:00~21:00 休息日：無休
粹日本小編親身實試鶯谷半日遊，想跟住食跟住行？參考下面Google Map為你標示文內所有景點，加點心意即使砌出屬於你既鶯谷之旅！ Google Map清單
下載粹日本App，網羅更多日本資訊 iOS Android
發現文章有任何問題請話俾小編知☞ 回報表格
