天下咁多美味，如果樣樣都食得百無禁忌當然幸福，但係亦有人係因為健康、宗教、環保等原因需要避免進食某啲食材。食物敏感就人人不同（當然），自願避食中常見既有肉及/或魚（素食）、動物性食材包括蛋、奶（環保、動保）、豬、牛、酒類（宗教）。

 

每年咁多外國人去日本旅行，日本對呢啲相對少數既飲食習慣又有無足夠照顧，如果你係其中一份子既話會唔會去到日本無啖好食，只能咬白飯糰？今次就由粹日本為你整理常見飲食限制響日本既現狀以及對應既覓食方法，等你唔會無啖好食！

食物敏感：記得留意「7+20」

日本法例規定，如果加工食物中有使用7種特定食材既話必須註明，另外有20種「建議註明」既食材。當然呢27種食材以外既材料都有可能成為致敏源，但於日本國內佢地係常見而且影響大既食材，所以特意立法確保消費者響購買前可以確認清楚。

強制7種裡面有常見既致敏食材如蝦、蟹、花生，而小麥除左致敏外同「無麩質飲食」飲食習慣都有關（後面會詳細講解）。而建議表示既20種中有豬肉同牛肉，如果因為宗教原因而要避開既話記得留意。但亦要注意「建議20種」並非法例要求，如有疑問記得先問清楚！

如果你既致敏源係上述27種以外既話，就記得出發前先check清楚食材既英文同日文，到時請餐廳職員、店員為你確認清楚先放入口！

唔食肉=無野食？

其實日本人係到近代先至興起食肉文化，過去以農業為主而且役畜數量有限，加上信奉佛教禁殺生等原因，非但民間少食肉，更曾經有過官方既禁肉令。然而響19世紀荷蘭人將肉食文化重新帶入日本，當時食肉被視為「開化」象徵，後來又將肉食文化同西方人體魄拉上關係，食肉既意義又得到強化。

 

另一方面，素食都分好多種，例如只係唔食肉但食魚、魚都唔食但食蛋奶、或者只要動物性食材就一定唔放入口，形形式式既素食者即使響日常生活要踐行都唔易，而當一眾素食者去到日本，食生活只會更痛苦 ……

 

唔少素食者去到日本時遇到既最大問題主要有以下幾點： ●日本唔少餐廳都係「獨沽一味」 ●定食屋、居酒屋雖然選擇多，但鮮有無肉正餐 ●素食專門店極少

 

日本好多餐廳都是專門店形式，拉麵店只賣拉麵、炸豬排店亦基本係獨沽一味，專注固然係好事，但係遇著唔食肉就即刻無野好食。就算你唔介意走入炸豬排店，唔介意人地廚具、炸油平時都係整肉食，店家可能只能offer到生菜同豆腐，唔好話正餐，想飽肚都難；

 

至於一般日式餐廳（定食屋、居酒屋），都絕少有無落肉同菜（及/或蛋、其他動物成分）既正餐料理，總無可能一餐只點小食，靠枝豆、豆腐同白飯過活 ……洋食方面，日本本土既洋食連鎖店（例如ガスト,Royal Host等）其實一樣，就連沙律都係有肉居多。

 

而所謂既素食專門店，現時一般只會見到「沙律專門店」，除非你OK每一日三餐都係冷菜，否則只靠沙律實在無法過活。

如果你係只戒肉但食魚既話，相信唔會有好大不便。而魚肉都唔食但可以接受「只食有肉料理裡面既菜」的話，一般定食屋、中華料理等都可以救你一命。而除左考慮沙律餐廳外，便利店亦係你既救星。雖然便當類同其他地方買到既一樣都係有肉無菜，但就有唔少麵包以及三文治可以選擇。如果你係連蛋同奶都唔食既話（vegan），都仲有飯糰（白飯、梅乾等等）可以食。

但記得小心關東煮裡面雖然有白蘿蔔、蛋、芋絲等素食，但湯頭普遍係用魚湯（部份地區可能會有肉類成分），如果你係嚴格唔食肉既話就要避免。另一個救星是可以俾你自己配搭料理既餐廳（謎之音：其實即係靚仔版三餸飯），通常都會提供一啲純菜料理選擇，咁就唔怕外食時揀無可揀，肉食朋友亦唔會無得食肉。最後仲有起源自佛教，以使用蔬菜為主打既精進料理，但要小心部份精進料理依然會使用魚湯、雞蛋，如果希望全素既話就記得要事先查詢。

 

想查詢一下日本邊度有素食餐廳既話，可以去Happy Cow既網頁確認： https://www.happycow.net/asia/japan/

伊斯蘭教的「清真飲食」

提到清真（Halal），通常諗到既係「唔食豬」、「唔飲酒」、「清真屠宰」。最簡單、直接、正宗既做法當然係去有清真認證既餐廳，或者買有同樣認證既包裝食物，自然可以確保食得到既必定符合教規。

 

之但係 ……響日本人住既外國人雖然唔少，但本土穆斯林加上外國人響比例上依然極低。較多伊斯蘭教徒聚居既地方較大機會有清真餐廳，例如東京既新大久保就有唔少獲得認証既餐廳。但其他地方想搵一間都難過登天 …… （想查詢邊度有既話可以去呢度： https://www.halalgourmet.jp/（英語））

 

所以去日本旅行既穆斯林就難免要退而求其次，而坊間亦有一啲無認証但有提供「清真料理」既餐廳，佢地可能會特地購入清真屠宰的肉，亦有可能係只是「不使用被視為不潔既食材」，為免犯禁，記得問清楚！而假如你願意接受只係「走豬」、「走酒」等，但唔強求清真屠宰既話，選擇就自然變多。但與此同時要小心留意以下情況（包括但不限於）：

 

●豬肉：使用豬肉、豬骨湯頭（拉麵）、使用豬油（豬網油）、豬肉提取既膠質、餐廳既餐廚具用黎料理過豬肉、牛豬混合既免治肉、漢堡排等 ●酒：調味酒、料理酒（味醂）、已揮發酒精成分既酒精材料

 

舉例日本名物親子丼（雞肉雞蛋蓋飯），睇樣既話上面只有雞肉、雞蛋、洋蔥等材料，但係一般親子丼食譜都會叫你加味醂（料理酒），外面食肆會用酒類調味既可能性更高；為免犯戒最好問清楚。

無麩質飲食

如前述，小麥為必須標明既七種致敏食材之一，所以加工食物包裝上都寫得清清楚楚，至少漢字既我地無難度。

問題係日本料理中多數都會使用鼓油，亦有唔少料理中會使用小麥粉增強黏性（繋ぎ），出街食飯時就要更小心。特別係麩質呢個概念，唔好話響日本，連香港人都未必個個明白係咩一回事，料理人自己可能都唔為意用左些少鼓油、啲啲小麥粉黎煮野。 雖然鼓油、小麥粉等既使用習慣同香港料理、中菜好接近，不過我地對日本菜既了解始終只係識食多過識煮，視乎你既敏感程度，最好事前向店家查詢料理中會唔會有使用特定材料。

日本人不喜素食？

食物敏感係體質問題無得避，但日本作為一個日本人佔多數既島國，宗教原因既飲食限制從來不是主流，餐廳自然無誘因去應對。 素食（無肉有魚）雖然過去係主流，但重新食肉已今都2個世紀，日本人亦已經習慣、愛上左肉食，另外「食肉去」響日本係被視為高級食物、獎勵既一種，食肉作為外國文化既印象既依然存在，呢D原因都使得日本人難以棄肉。

此外亦有人意識到，日本人愛從眾既民族性對飲食都有影響，朋友、同事、身邊既人都唔係素食者既話，作為日本人好難開聲話自己禁肉；一齊出街食飯諸多禁忌、點菜時搵黎搵去「惹人目光」，對日本人黎講真係牙痛咁聲。甚至乎有過真實例子，被上司捉去同事間聯誼「增進感情」，被勸酒/請食肉時婉拒，就被鬧「唔識讀空氣」（唔識睇氣氛/特立獨行/唔跟機/唔俾面）、「大支野扮大排」，而被鬧既小薯可能只係唔想食唔飲得酒，亦試過係酒類敏感都照被鬧。所以你話，想成為素食者就要有信心被人__，點算好？

 

隨著2020奧運、觀光立國等來臨，不變不變仍須變，但係暫時想要有啖好食依然要下點苦功。下次去日本旅行前先查清楚想食咩、有咩食，做好準備就唔會彷徨啦！

---

下載粹日本App，網羅更多日本資訊 iOS Android