日本人鍾意飲酒、被迫鍾意飲酒，但係酒量卻唔係真係咁好，呢一個有趣既現象相信唔少人都知道。咁鍾意飲酒既日本人，自然發展出屬於日本人既酒吧：居酒屋！ 你對酒既認識又有幾多？香港都有既啤酒、紅、白酒大家一定飲過，但係你又識唔識得分辨日本人鍾意飲既「サワー」、「酎ハイ」係咩黎？今次由粹日本為大家講解日本居酒屋中常見既各種酒類飲品，下次去日本實行扮成日本人，走入居酒屋大飲特飲！

（日本法例規定20歲起方可買酒、飲酒；飲酒不宜過量；飲酒不駕車、駕車不飲酒）

とりあえず、生！

如果你有同日本人一齊去居酒屋既經驗既話，可能會留意到第一杯先飲「生啤」既比例高達99.9%。日本人之間有個不成文習慣叫做「とりあえず、（一杯目は）生ビール」（總之第一杯嗌生啤）。加上日本人鍾意跟機既民族性，好容易就會出現first round成台生啤既情況。 當然如果你唔想飲生啤既話，鍾意點咩就點咩，（雖然公司飲酒會既話可能上司會俾面色你睇），但係鍾意飲咩酒當然係自己話事！

居酒屋有咩酒飲？

一般而言日本居酒屋都有以下酒類提供： 啤酒（ビール） 清酒（日本酒） 威士忌（ウィスキー） 果實酒：紅白葡萄酒（ワイン）、梅酒（梅酒） Highball（ハイボール） 燒酒（焼酎） Sour（サワー） 燒酒Highball（酎ハイ） 泡盛（泡盛）

---

啤酒（ビール） 唔駛解釋大家都明。日本大牌子アサヒ（Asahi）、Orion、恵比寿、キリン（Kirin）、サントリー（Suntory）。 日本清酒

使用稻米釀造既日本清酒足以代表日本文化，想知道日本清酒多D？可以睇呢度。 葡萄酒（紅、白） 同樣無須多解，唔係間間日式居酒屋都會賣葡萄酒，而且多數係名不經傳既平野，想買法國大酒莊出品既話，乖乖地去法國餐廳啦。 梅酒

提到梅酒，100個香港人120個都會諗起「CHOYA梅酒」，其實日本出產梅酒既並唔只choya（チョーヤ），鍾意梅酒既你，去到居酒屋記得試下其他既出品！ 如果你依然係鍾情CHOYA既話，就記得睇下呢度既CHOYA詳細解說~ ハイボール(High Ball) 日本獨有既酒精飲品第一款：ハイボール！ 據說High Ball最初係蘇格蘭人將威士忌混合梳打水，邊打高爾夫球邊飲既酒，不過依家High Ball已經變成日本具代表性既酒精飲品。

一般既High Ball酒精含量約為10%，雖然使用威士忌但比純飲要易入口，過去High Ball係用平價威士忌調製，今時今日作為平民日常飲料之中，價錢相宜（300~500円一杯）使用既威士忌多數都是較為平民既款色，但亦有使用高級、貴價威士忌調配； 貴有貴飲、平有平飲，想醉？唔難！ 酎ハイ / チュウハイ（燒酒High Ball）

呢一款「燒酒High Ball」，同頭先既High Ball最大既分別係使用既酒既分別。High Ball用既酒係威士忌，而燒酒High Ball用既係「燒酒」（焼酎）。呢度所講既燒酒雖然同中國既白酒同源，但係酒精濃度無咁高，通常係25%左右，兌左梳打水後濃度更低。 サワー（Sour） 今次係真‧顧名思義，因為語緣係英文「Sour」既意思，所以可以被稱為「サワー」既飲品都係酸既。製作方法係混合帶酸味既柑橘類果汁同蒸餾酒，常見既有「檸檬Sour」、「柚子Sour」、「青檸Sour」。另外雖然唔係水果，一d鋪頭會將カルピス（可爾必思，一種乳酸菌飲料）同酒精混合製作「カルピスサワー」。

以上幾種使用既都是我地一般理解既烈酒，而響日本按「酒稅法」將烈酒明確分類，所以即使同樣係酒精濃度高既烈酒，使用唔同種類既烈酒就會變成唔同款色既調酒~~ 至於唔做調酒而係純飲既話，通常會提供以下2類： 焼酎（燒酒） 無錯，就係頭先用黎整燒酒High Ball既燒酒。響日本，燒酒可以係用米、蕎麥、蕃薯等釀造，當然唔少人會純飲，不過更常見既依然係用黎做唔同既調酒，減低濃度加強口感同味道。 泡盛 雖然泡盛響製法上係燒酒既一種（過去響日本亦曾經被分類為燒酒出售），泡盛屬於沖繩本土既名產，而且響釀造方法上有以下特點： ●　使用米釀造（其中多數是使用泰國米） ●　使用「黒麹菌」 ●　使用單式蒸餾機蒸餾（可以有效保存原材料的風味）

雖然製法符合上面幾點就算係「泡盛」，根據使用既材料等等，泡盛一樣有唔同品牌、款式、風味，去到沖繩時記得去試飲下唔同既泡盛，搵到鍾意既話就買番香港啦！

題外話：去居酒屋時既注意事項

除左認識酒類以外，仲要留意日式酒酒屋都有自己既獨特文化，小心行事唔好搞錯！ お通し（送酒小菜）

唔少居酒屋響你未點野食未點野飲前就會送上一道「お通し」，可能係一小盆既四季豆、或者係一人一小碟既輕料理。記得留意呢Dお通し係要收錢，而且無得話唔要，同你去茶樓就算唔飲茶都要俾茶介、服務幾差都有加一服務費一樣； 當然，日本人同你我一樣都唔多滿意呢D「附加費」，有一D居酒屋已經唔再提供お通し，有一D就會俾你響幾種裡面自選，有篩選但至少有得揀，袋住先 ……？ 喫煙・禁煙

日本唔同香港未實施食肆全面禁煙，取而代之既係一間餐廳裡面會分為吸煙區（席）及非吸煙區（席）；只不過有一D所謂既分開，只不過係隔左條走廊 ……

做足準備，下次去日本時記得去居酒屋體驗一下啦！記得唔好好係下面呢位上班族咁醉倒街頭就得XD

---

下載粹日本App，網羅更多日本資訊 iOS Android