根據香港政府統計處嘅最新數字，香港2017年吸煙人口比例為61.5萬人（10%）（男性18.1%、女性2.7%），而日本的吸煙人口則是男性33.7%女性10.6%（2005年數字），睇數字嘅話日本嘅煙民比例定實際數目都比香港高出一大截，但係日常生活（以及旅行）時，反而唔覺得日本有咁多人食煙 …… 今次粹日本就為大家講解一下日本嘅吸煙文化，無論你係唔係煙民都好，都可以藉此了解日本嘅另一面；當然如果你係食煙一族，去到日本時就記得要入鄉隨俗啦。

包裝時尚仲周街都買到？

香港嘅香煙包裝換上「嚇人包裝」已經有十年歷史，而日本嘅香煙盒雖然有加上警告字句，但就不及港版有彩色圖片仲要大大張，而且配合日語溫和特質，睇完真心無「警告」作用。

ﾐﾝﾀｽｩ~~~（@mintasuu）分享的貼文 於 PDT 2018 年 4月 月 19 日 上午 6:31 張貼

響香港買煙一係就便利店一係就報紙檔，日本便利店、超市等當然都有煙賣，但除此以外仲有唔少「タバコ屋」專賣香煙，亦有超級方便嘅香煙自動販賣機，雖然有確認年齡嘅裝置防止未成年者吸煙，但係風氣上食煙依然係有型、成熟嘅代名詞。

行住食煙與路邊吸煙區

買煙就方便過人，但食煙就唔係易事。香港人會圍著垃圾桶「打邊爐」，邊行邊食亦係常事；而我地去日本旅行時感覺唔到吸煙風氣嘅一大原因，正係因為我地甚少見到街邊有人食煙，亦唔多覺有煙味。

日本多數地區都有訂立法例/作出勸導杜絕邊行邊食煙嘅文化。而大家都知道日本連垃圾桶都唔多個，自然無得俾你隨街打邊爐。取而代之嘅係響街道特定地點設立「吸煙區」，部份以圍板分隔，亦有密封+換氣系統，想食煙嘅話就一般就係入去食。

除此以外日本市面有大量被稱為「攜帶灰皿」嘅輕便煙灰皿，大家有時會見到日本人（主要係上班族）一個人企響路邊食煙，不過佢地多數會將煙灰同煙蒂放入攜帶灰皿而唔係扔落地。整理市容之餘亦減少危險。

餐廳的禁煙・喫煙

香港食肆全面禁煙已經好幾年，日本則至今仍然係行「分煙」模式，餐廳如果唔係全禁or全部可以吸煙，就會分開樓層、區域劃分為吸煙區同禁煙區；另外亦有一啲餐廳（cafe居多），唔會有吸煙區但會有吸煙室，可以俾你入去快活一下，然後出黎繼續飲咖啡食野。

至於全禁嘅餐廳，多數會請客人去餐廳外面食煙，有一d仲會響出面放定煙灰缸方便你添。 有響餐廳內分開吸煙、禁煙嘅餐廳，一般會響訂位/入座時問你是否食煙，點樣話佢知你嘅選擇？ 食煙：（タバコ）吸います。[(Ta-ba-ko) su-i ma-su] 唔食煙：(タバコ)吸いません [(Ta-ba-ko) su-i ma-sen] / 禁煙の席をお願いします [kin-en no se-ki o o-ne-ga-i shi-ma-su]

吸煙小休（タバコ休憩）

一般日本辦公室都係全面禁煙，但同時員工中有一定比例係煙民，所以幾乎所有公司都會劃出「吸煙區」或者「吸煙房」俾吸煙員工使用。

煙癮起出去食番支煙，諗都知唔會有人帶埋部notebook出黎做野，一日食幾支煙、一支食5分鐘，計計埋埋等於煙民員工一年返少幾日工。正所謂不患寡但患不均，食煙者平白多左小休時間，唔食煙嘅無得話「出去飲罐咖啡」就走左去，自然引起不滿。 日本有小部份企業對吸煙小休或者吸煙本身執得好正，好似星野resort直情講到明唔請煙民，亦有企業明令唔會有「吸煙小休」。 另外隨著吸煙以及二手煙、三手煙的危害得到證實，日本奈良縣生駒市嘅市政府最近就推行新例，食完煙後45分鐘唔可以坐?，希望可以減少密封空間困獸鬥時對非吸煙者嘅危害。

粹日本忠告：吸煙危害健康

---

下載粹日本App，網羅更多日本資訊 iOS Android

 

發現文章有任何問題請話俾小編知☞ 回報表格