小編一直懷疑每個香港人都總有幾個日本人朋友，如果有朝一日你會去你嘅日本人朋友屋企玩嘅話，你千祈千祈千祈要記得，日本人係有好__多禮儀同規矩。
到訪時間
最基本嘅原則當然係要配合對方嘅schedule，唔好響人地唔得閑嘅時候打搞人。早上10點至11點以及下午1點至4點，係一般日本人認為恰當嘅時間。即係話太早、太夜都最好避免，另外除非你打算去黐飲黐食，否則開餐時間都最好避免。
日式「攞梳蕉」上門
去日本人屋企嘅話記得要帶禮物先好上門，價錢（日本公價）係2000円至3000円，香港嘅話拜年時係強制，其他時間只算係「心意」，但係日本嘅話唔帶禮物就上門係not appropriate。
除左價錢以外響買禮物時仲要留意2樣野：
數量：按對方屋企人數，買數量稍多即可；但要留意唔好買「4個」或「9個」呢啲日語中負面諧音嘅數目； 地點：唔好響人地屋企附近嘅鋪頭買，要「特登」去遠少少嘅地方入手。 點樣將禮物交畀對方？睇呢度！
準時就係好？
約左10點，係唔係10點踏正撳門鐘就啱？有關到達時間嘅問題，要考慮嘅係到訪原因； 如果係商業拜訪嘅話，需要提到5～10分鐘到達。但如果係去人地屋企，私人性質嘅到訪嘅話，反而應該遲3～5分鐘先去敲門。 點解，原因據說係等主人家可以確保自己準備好 。。。。喎。但係如果你係真‧遲到嘅話，就記得聯絡人啦。撳門鐘前要做咩？
唔係伸手指出黎，而係先除低你嘅外套、帽、手套等等，之後先至去敲門/撳門鐘。
另外建議將外套外側向內對半折，此舉係將外面嘅灰塵折向入去，避免整污糟人地屋企。
打招呼
記得唔係「Hi!」或者「食左飯未？」，而係「お邪魔します」(Ojamashimasu)，大概意思就係「唔好意思打搞曬」， 講完然後一路遞上禮物就得 。。。。
你以為啦。 畀禮物時係有一套特定用辭嘅。有唔少日本人會講「つまらないものです」（大概意思係「求其買嘅碎料黎架咋」），但係現今日本人會覺得呢種講法太過虛偽同扮野
聽聞你鍾意XXX 希望你鍾意啦！ 呢期興XXX，希望你鍾意啦
真正，入屋時
日本人屋企有「玄關」，響講完上面啲野後，你就可以除鞋，然後著上為你準備嘅拖鞋。之後記得要自己跪低，將鞋頭轉向大門方向。（唔好彎身以及將個八月十五對住主人家）
最好唔好著長靴，穿著需時麻煩到人。而夏天時最好著番襪（i.e.唔好著涼鞋）。
點樣坐都有學問
你可以將袋放響地下，而外套可以選擇放響袋上面，如果係有椅背嘅話外套可以掛響椅背。
一般而言主人家會請你就坐，如果無特別話你知坐響邊嘅話，大原則係坐響房間入面最近門嘅位置（坐響邊牽涉日本一樣好麻煩既概念「上座‧下座」）
點樣走人
「公價」係2～3小時，視乎你係去做咩啦。一般而言由到訪者提出係時候離開，記得打算走人時要講個「哎呀唔好意思傾得太開心坐得太耐添」 「係時候返屋企煮飯啦我」
講完先好走呀。
臨行出門口時要記得講番句「お邪魔しました」（Ojamashimashita），你可能發現同一開始個一句差唔多 。。。。因為走時講嘅係過去式。
老老實實，日本人拜訪他人時嘅禮儀絕大多數都好合理，小編細個時都係學類似嘅野。只不過日本最大分別係就算你同對方好熟，就算已經係第N次上去，同樣嘅禮儀都係要繼續黎。禮節呢家野，無人care嘅話就咩都唔係，如果是旦有一個人好care嘅話就變成天大一樣嘅事。 假如有一天你要去日本人屋企嘅話，從頭到尾睇多次呢篇文啦。
下載粹日本App，網羅更多日本資訊 iOS Android
發現文章有任何問題請話俾小編知☞ 回報表格
