謎之關東煮大攻略！呢5款材料你又識唔識？！

前排東京忽然落左一日大雪，從一月起到依家日日都咁凍，港人小編表示非常極之懷念同朋友仔一齊打邊爐食大家口水（大誤）的時光? 日本無港式邊爐，但係有熱辣辣嘅「關東煮」！曾經何時關東煮係要專門店同居酒屋先有，不過自近年響日本各大便利店都買得到，邊度都食得到簡直係寒天恩物！

關東煮？廣東煮？

所謂嘅「關東煮」響日語正名叫「おでん」，至於點解中文會變成關東煮？？其實響日本有關「おでん」有幾個說法，其中2個分別係： 1) 過去被稱為「関東焚」、「関東煮」，原本是日本「關東地區」嘅野食，後來傳到關西至發揚光大，所以保留著過去嘅名稱（此為日本最普遍的解釋） 2) おでん其實是廣東省傳黎嘅食物，所以過去被稱為「広東煮」，後來寫成「関東煮」。所謂嘅廣東煮，小編見又無見過、聽又無聽過，神奇過「香港料理」嘅的士飯；反正現時已經係徹頭徹尾嘅日本料理，照食可也！！

睇相唔sure睇名又唔明？粹日本幫到你！

（唔識日文嘅）港人去日本兩大法寶： 睇相手指指！！ 睇漢字！！！ 呢兩招到依家都咁幫到手，就算係小編學左幾年日文，都有時要靠漢字同圖先知邊樣打邊樣（唔溫書唔努力嘅同學）但係響日本嘅關東煮裡面係有幾種睇圖唔多明，又唔係用漢字命名或者日本獨有漢字意思嘅關東煮，好想食但係唔敢點？粹日本幫到你！

こんにゃく（蒟蒻）

先黎一個簡單嘅，寫こんにゃく無人明，「蒟蒻」應該無問題啦掛？響香港通常提到蒟蒻都係聯想到啫喱（蒟蒻畑），但響日本蒟蒻可以用黎煮餸，有唔少料理都會落蒟蒻。

はんぺん（半片 / 半弁 / 半平）

如果你有買過關東煮，有可能見過一個浮下浮下嘅（白色）半圓球 / 三角形，嗰個就係「半片」！

半片同獅子狗等都係「練り物」，即係用魚絞肉整出黎嘅野食（魚蛋嘅好朋友），雖然同為魚漿製品嘅獅子狗、魚丸等都係魚肉製造，但因為半片製作時會拌入較多空氣所以無咁易沉，相比其他魚漿類食物亦要較為輕盈；不過好似小編咁鍾意食實心野唔鍾意輕漂漂野嘅話就無謂點半片啦！

（餅入り）巾着

有時候只會寫「巾著」，如果寫明「餅入り」即係裡面包嘅係麻糬（もち / 餅），至於無寫嘅話可能係麻糬，亦可能係其他嘅餡料；用黎綁著個油豆腐片開口嘅通常係「干瓢」，昆布，即係瓢瓜乾。會叫做巾著係因為似日本人常用，用布製成的束口小袋「巾著袋」而得名。裡面有餡同芝士丸一樣，食時睇熱呀！

白滝

白色的瀑布 ….. ？No No No！呢一款可能係大家最易認得，打邊爐都會食嘅，不過我地就叫佢做芋絲；其實「白滝」都係蒟蒻，不過製作方法有唔同，口感亦較爽脆。

麩

最常見嘅關東煮麩係「車麩」，同車呔差唔多樣而得名，質感厚實而且好有營養！

夏天都有關東煮？70yen SALE嘅幸福時間

雖然關東煮俾人嘅印象係熱湯料理，適合凍一凍嘅冬天食，不過人係犯賤嘅，冬天食雪糕夏天當然食熱野啦！背後不無道理；近年盛夏之時日本各便利店就會開始賣關東煮，據說店方認為去到7月左右，人已經習慣左熱天氣，食得太多生冷野就會想食番D熱辣辣嘅野食，所以關東煮響夏天一樣好賣！另外如果各位同小編一樣去得太多日本已經好難上車嘅話，就要留意不定期嘅70 yen 關東煮大特賣啦！！平時價格各異，多數都過100yen嘅關東煮會劃一賣70 yen，即係7個都不過係490yen 嘅「ONE COIN價」（一個500yen硬幣就買得到，係日本人用黎分平野貴野嘅界線之一），如果你響日本時遇見sale，記得買番D試下！